Er ekki að fara til Real Madrid

Bakvörðurinn Ashley Cole hefur blásið á fregnir sem enn hafa blossað upp um að hann sé á leið til Real Madrid á Spáni, þar sem fjölmiðlar ætluðu honum að taka við af Roberto Carlos. Cole hefur verið meiddur síðan í október, en er nú óðum að ná sér.

"Ég á þrjú ár eftir af samningi mínum við Arsenal og ég hlakka til að spila á nýja heimavellinum. Hvert einasta blað í landinu hefur verið að slúðra um að ég sé á leið frá Arsenal í allan vetur og ég get bara ekkert að því gert. Menn halda áfram að skrifa fréttir. Það eina sem ég vil í augnablikinu er að ná heilsu svo ég geti haldið áfram að spila með Arsenal," sagði Cole, sem vonast til að geta farið að spila á ný mjög fljótlega eftir þrjá mánuði í meiðslum.