Leitin að Maríu og öðrum stjörnum

Breska leikhúsbransablaðið Stage sem kemur út vikulega og heldur uppi öflugri vefsíður tekur árlega saman lista yfir áhrifamestu menn í breskum leikhúsiðnaði: Þar situr í efstu sætum listans í ár kempan Andrew Lloyd Webber og félagi hans David Ian, í þriðja sætinu er framleiðandinn Cameron McIntosh.

Þetta þykir bresku pressunni fyndið en Webber og Ian urðu fjandvinir meðan þeir leituðu að stúlku í hlutverk Maríu í Sound of Music sem þeir eru að framleiða. Leitin fór fram í þáttaröðinni How Do You Solve a Problem like Maria? sem var vinsæl í Bretlandi í ár. Átta miljónir fylgdust með þegar óþekkt leikkona, Connie Fisher, fékk hlutverkið, en sýningin kemur á svið í september og mun stúlkan vinna við það næstu árin að syngja hin kunnu lög úr Sound of Music. Hafa þegar selst miðar fyrir 12 milljónir punda á sýninguna.

Webber var í þriðja sæti í fyrra en er nú kominn í fyrra form. Hann sat í efsta sæti fimm ár í röð: liðið ár var honum líka gott. Hann eignaðist öll leikhúsin sín aftur, setti Evitu á svið á ný og fór að vinna við söngleikinn sinn nýja sem byggir á sögunni frægu, Meistaranum og Margarítu eftir Mikhail Bulgakov.

Ian er uppgjafa leikari sem fór að framleiða sýningar 1990. Hann rekur stærsta event-fyrirtæki í heimi og setti í ár upp 35 milljóna dollara sviðsetningu á Óperudraugnum í Las Vegas – sem er reyndar eftir Webber. Það er talin dýrasta sviðsetning sögunnar á söngleik.

Þræta þeirra félaga jókst þegar í ljós kom að Ian var í viðræðum við NBC um að setja Grease á svið á Broadway án þess að láta Andrew vita. Þar verður sama leið farin: You’re the One that I Want heitir sjónvarpsþáttaröð sem byggir á hugmyndinni um að leita að stjörnum í Grease. Systurþáttur verður gerður í Bretlandi af fyrirtæki Simons Cowell. Webber undirbýr samskonar þátt fyrir BBC þar sem leitað verður að manni í titilhlutverk Joseph and the Amazing Technicolor Dreamcoat sem Webber samdi líka.

Hundrað manna listi Stage birtist í dag og er langt í að þar verði ofarlega leikarar, leikstjórar eða leikskáld.