Sjö ára börn fara í megrun

Vandamálið fer vaxandi og að mínu viti full ástæða til að vara foreldra barna við með þeim hætti sem við gerðum, segir Nanna Kristín Christiansen, námsráðgjafi í Vesturbæjarskóla. Sífellt yngri stúlkur fari í megrun og láti ekki hvað sem er inn fyrir varir sínar vegna þess. Vandamálið sé þekkt meðal stúlkna allt niður í sjö ára aldur.

Í Vesturbæjarskólanum þótti þetta það alvarlegt að hjúkrunarfræðingur skólans sendi foreldrum barna í yngstu bekkjardeildum bréf þar sem vandamálið var tíundað. Var foreldrum bent á að vera á varðbergi og fylgjast með mataræði barna sinna og þá sérstaklega hjá stúlkunum. Vandamálið er þó ekki einskorðað við þann skóla en flestir þeir skólahjúkrunarfræðingar sem rætt var við voru sammála um að það væri til staðar þó ekki væri það áberandi hjá svo ungum stúlkum.

Að sögn Nönnu Kristínar læra börnin það sem fyrir þeim er haft og segir hún ekki eiga koma á óvart að svo ungar stúlkur séu orðnar fastar í sama vef og margar eldri. Það er reglulega keppni milli stúlkanna um hver sé mjóust og hver sé feitust og okkur fannst full ástæða til að kynna þetta fyrir foreldrum og eins ræða við börnin sjálf um hollustu, gott mataræði og almennt það sem varast skal.

Fram kemur í rannsókn um heilsu og lífskjör skólanema sem gerð var í vetur að hlutfall nemenda sem telja sig þurfa að léttast er ekki í nokkru samræmi við umfang slíkra vandamála út frá heilsufræðilegu sjónarmiði. Jafnframt liggur fyrir að margir eru haldnir óraunhæfum hugmyndum um vaxtalag sitt og æskilega líkamsþyngd.