Sjúkraliðar látnir sitja á hakanum

Sjúkraliðar hafa vísað launadeilu sinni við launanefnd sveitarfélaga til Ríkissáttasemjara. Formaður Sjúkraliðafélags Íslands segir ástæðuna þá að launanefndin hafi ekki gefið sér tíma til að funda með sjúkraliðum.

Kristín Á. Guðmundsdóttir, formaður Sjúkraliðafélags Íslands, segir félagið hafa gefist upp á biðinni eftir að launanefnd sveitarfélaga sæi sér fært að ræða launamál sjúkraliða. Hún segir samninga hafa verið lausa síðan í nóvember og þó að fyrst um sinn hafi verið beðið eftir samningum sjúkraliða við ríkið hefðu viðræður við sveitarfélögin að geta hafist síðasta sumar, það hafi hins vegar ekki gerst. Kristín segir að fyrst hafi sumarfrí launanefndarmanna tafið fyrir samningum og síðan hafi launanefndin einbeitt sér að samningum við starfsmannafélög sveitarfélaga þar sem verkföll hafi legið í loftinu.