Hannes lék allan leikinn með Stoke

Hannes Sigurðsson lék allan leikinn með Stoke sem tapaði útileik fyrir Derby 1-0 í ensku 1. deildinni í fótbolta í dag. Sem fyrr var Þórður Guðjónsson ekki í leikmannahópi Stoke en hann er á heimaleið um áramótin. Jóhannes Karl Guðjónsson kom inn á af varamannabekknum á 71. mínútu í liði Leicester sem vann 2-1 útisigur á Watford. Bjarni Guðjónsson kom hins vegar ekkert við sögu hjá Plymouth sem tapaði á heimavelli, 0-1 fyrir Sheffield Wednesday. Sheff Utd er efst í deildinni með 33 stig eða 6 stiga forystu eftir 1-0 sigur á Wolves í dag. Reading, lið Ívars Ingimarssonar og Brynjars Björns Gunnarssonar er í 2. sæti deildarinnar og getur minnkað muninn á toppliðið með sigri á Ipswich á morgun, sunnudag.