Valsstúlkur kjöldregnar af Potsdam

Kvennalið Vals var tekið í kennslustund af Evrópumeisturum félagsliða, Potsdam frá Þýskalandi, á Laugardalsvelli í dag. Eftir að leikurinn var nokkuð jafn í fyrri hálfleik, opnaðist fyrir allar flóðgáttir hjá Val í þeim síðari og niðurstaðan 8-1 sigur þýska liðsins. Valsstúlkur hafa staðið sig frábærlega í keppninni til þessa, en mættu einfaldlega ofjörlum sínum í dag. Lokatölur leiksins gefa í raun ekki rétta mynd af þróun leiksins, en þó sýndi lið Potsdam af hverju það er lið í heimsklassa í dag, þegar það nýtti færi sín fullkomlega og gersigraði Val. Flestir leikmenn Potsdam eru fastamenn í heimsmeistaraliði Þjóðverja og því ljóst að þar eru engir aukvisar á ferð. Liðin eiga eftir að mætast öðru sinni í Þýskalandi, en þar verður róðurinn væntanlega þungur fyrir Hlíðarendastúlkur.