Ralf á ráspól í Japan

Þýski ökuþórinn Ralf Schumacher hjá Toyota verður á ráspól á Suzuka brautinni í Japan á morgun, eftir að hann náði bestum tíma allra í regnvotri tímatökunni í nótt. Annar varð Jenson Button og Giancarlo Fisichella átti þriðja besta tímann. Michael Schumacher átti besta tíma allra á æfingu í gær, en lenti í vandræðum eftir að aðstæðurnar á brautinni versnuðu í rigningunni og varð að láta sér lynda fjórtánda sætið. Heimsmeistarinn Fernando Alonso hafnaði í sextánda sæti og Kimi Raikkönen hafnaði í sætinu þar á eftir, en hann hafði sig hægan í nótt, vitandi af tíu sæta refsingu sinni í rásröðinni eftir að vélin í bíl hans gaf upp öndina á föstudag.