Naumur sigur Arsenal

Arsenal vann 1-0 sigur á Birmingham í ensku úrvalsdeildinni rétt í þessu og var það Robin van Persie sem skoraði eina mark leiksins á 81. mínútu. Skot Persie hafði reyndar viðkomu í Stephen Clemence og breytti um stefnu, þaðan í Taylor markvörð og yfir línuna. Birmingham lék einum manni færri frá 24. mínútu þegar Kenny Cunningham fauk út af fyrir að brjóta á Fredrik Ljungberg sem var kominn einn inn fyrir vörnina. Dæmd var vítaspyrna sem Maik Taylor varði en hann átti stórleik í marki Birmingham. Yfirburðir Arsenal voru algerir í leiknum og úrslitin sanngjörn en Arsenal átti 16 skot að marki Birmingham gegn 2 skotum gestanna. Arsenal er nú komið í 7. sæti deildarinnar með 13 stig, jafnmörg og Wigan en Birmingham í 15. sæti með 6 stig.