Verða að spila skemmtilegan bolta

Martin Jol, knattspyrnustjóri Tottenham, segir að toppliði Chelsea beri skylda til að spila skemmtilega knattspyrnu, því það muni tryggja að áhorfendur haldi áfram að mæta á völlinn á Englandi. Þetta segir hann í ljósi fréttaflutings undanfarið um dræma ásókn á leiki á Englandi og ásakanir á hendur ensku liðanna um að þau spili of skipulagðan varnarleik. "Ég held að Jose Mourinho sé hugsjónamaður, " sagði Jol um kollega sinn hjá Chelsea í samtali við BBC í dag. "Hann er ekki bara þjálfari, heldur er hann maður sem vill að lið sitt spili skemmtilegan bolta. Hann verður líka að gera það, því ef lið ætla sér að vera á toppnum, verða þau að spila skemmtilegan bolta, því annars mætir enginn á völlinn," sagði Jol. "Við getum ekki ætlast til annars en að liðin á Englandi spili skemmtilega knattspyrnu, því við erum algjörlega háðir því að fólk mæti á völlinn og það gerist ekki ef liðin spila leiðinlegan bolta. Sjáið bara þjálfara eins og Louis van Gaal. Hann blandaði saman árangursríkum og skemmtilegum bolta þegar hann stýrði Ajax á sínum tíma, þó liðið væri mjög ungt. Því skyldu menn hér á Englandi ekki geta gert það sama," sagði Jol.