Réttað yfir ræningjum

Réttað var í gær yfir tveimur mönnum, 42 og 18 ára gömlum, í Héraðsdómi Reykjavíkur vegna ránstilraunar við Hamarsgerði í Reykjavík í mars í fyrra. Þar réðust þeir á mann með trékylfu og slógu hann ítrekað með henni og krepptum hnefa. Heimtuðu mennirnir að fá afhenta peninga, en flúðu svo af vettvangi þegar íbúi kom út úr húsinu. Þeir þekktu ekki til fórnarlambs síns. Þá er eldri maðurinn einnig ákærður fyrir að hafa haft í fórum sínum 1,7 grömm af amfetamíni, 0,3 grömm af kannabis og ellefu e-töflur, þegar lögregla tók hann síðar sama dag. Maðurinn sem ráðist var á krefst tæplega 750.000 króna í bætur.