Vonar að Gerrard fái verðlaun

Rafael Benitez, knattspyrnustjóri Liverpool, segist vona að Steven Gerrard verði valinn verðmætasti leikmaðurinn af UEFA á næstu dögum, en hefur meiri áhyggjur af því að fyrirliðinn nái heilsu fyrir leikinn við CSKA Moskvu um titilinn meistarar meistaranna á föstudag. "Það yrði jákvætt fyrir Steven að fá þessi verðlaun, en ég held samt að hann hafi meiri áhyggjur af fótarmeiðslum sínum þessa stundina, því hann vill gera allt sem hann getur til að mæta Moskvuliðinu í Mónakó á föstudaginn. Við þurfum líka á honum að halda, en það er erfitt að keppa svona marga leiki í byrjun tímabilsins" sagði Benitez.