Eto´o vildi ekki til Chelsea

Kamerúninn Samuel Eto´o hefur greint frá því að hann hafi hafnað tilboði frá Chelsea um að ganga til liðs við þá í sumar og mun þess í stað ganga frá nýjum samningi við Barcelona fljótlega. "Ég veit að Chelsea vildi fá mig, en ég hef alltaf sagt að ég vilji helst vera hjá Barcelona. Peningar eru ekki það mikilvægasta í heiminum og konan mín var lítt hrifin af því að flytja til London," sagði Eto´o. Forráðamenn Barca segjast heldur ekki vilja selja leikmanninn. "Samuel er einn mikilvægasti leikmaður liðsins, ekki bara vegna allra markanna sem hann skorar, heldur leggur hann einnig mikið upp fyrir félaga sína og er mjög vinnusamur. Að mínu mati er hann besti leikmaður heims í sinni stöðu," sagði forseti Barcelona.