Ciudad í úrslitaleikinn

Ólafur Stefánsson og félagar í Ciudad Real voru rétt í þessu að tryggja sér farseðilinn í úrslitaleik Meistaradeildar Evrópu í handbolta en liðið tapaði með tveggja marka mun fyrir franska liðinu Montpellier, 33-31. Það kemur ekki að sök þar sem Ciudad sigraði fyrri leik liðanna á Spáni með 6 mörkum, 30-24 og fara því áfram á betri markatölu samanlagt í einvíginu. Staðan í hálfleik var 17-15 fyrir Montpellier sem náði aldrei meira en 2 marka forskoti í leiknum. Ólafur átti ekki góðan leik, skoraði ekkert mark og fékk rauða spjaldið í seinni hálfleik eftir þrjár brottvísanir. Markvörður Ciudad var maður leiksins en hann varði á þriðja tug skota.