Blýmengun hættuleg börnum

"Blýmengun getur gert börn að glæpamönnum," segir í nýjum niðurstöðum vísindamanna í Bandaríkjunum. "Jafnvel lítið magn af blýi getur valdið árásargirni og hegðunarvandamálum hjá börnum." Dr. Herbert Needleman við Pittsburgh-háskóla hefur komist að því í rannsóknum sínum að unglingar sem voru ítrekað handteknir fyrir glæpi höfðu meira blýmagn í líkamanum en aðrir hópar. "Það eru vissulega fleiri þættir sem skipta máli en ef blýmengun væri minni væru færri glæpir framdir í Bandaríkjunum," sagði Needleman á ráðstefnu nýlega. Hann mælir með að ung börn séu mæld reglulega þar sem það sé ekki kostnaðarsamt. "Þá er hægt að gera ráðstafanir eins og að fjarlægja börnin frá mengunarvaldinum." Lengi hefur verið vitað að blý veldur skemmdum á heilanum og rikisstjórnir víða hafa tekið á vandanum, meðal annars með því að framleiða blýlaust bensín og málningu. En dr. Needleman segir nýjar sannanir fyrir því að meira að segja í litlu magni sé blýið mjög skaðlegt, Larry Silverman, sérfræðingur hjá umhverfisráðuneyti Bandaríkjanna, segir þó að fólk verði að axla persónulega ábyrgð. "Jafnvel þó suma glæpi megi rekja til blýmengunar er engum greiði gerður með því að kenna blýi um allt sem aflaga fer. Fólk verður að læra að axla eigin ábyrgð," segir Silverman.