Hellisheiðin lokuð

Innanlandsflug hjá bæði Íslandsflugi og Landsflugi liggur niðri vegna vonskuveðurs. Það hefst í fyrsta lagi klukkan ellefu þegar athugað verður með möguleika á flugi á nýjan leik. Kolvitlaust veður er nú á Hellisheiði og hefur henni verið lokað. Umferðin rétt mjakast áfram og nokkrir bílar hafa farið út af vegum. Engin slys hafa þó orðið. Hjálparsveit skáta í Hveragerði vinnur nú við að aðstoða ökumenn sem komast hvorki lönd né strönd. Á Reykjanesbrautinni er einnig mjög blint og er þeim tilmælum beint til ökumanna að aka varlega þar. Víðar á Suður- og Vesturlandi er einnig skafrenningur og mikill éljagangur.