Morientes vill fara til Liverpool

Fernando Morientes hefur látið hafa eftir sér að hann sé meira en tilbúinn til að ganga til liðs við Liverpool í janúar, en framherjinn hefur lítið fengið að spreyta sig hjá stjörnuprýddu liði Real Madrid þar sem hann er á eftir Raul, Ronaldo og Michael Owen í goggunarröðinni. Talið er að Real vilji fá 8 milljónir punda fyrir framherjann sem var markahæstur í Meistaradeildinni á síðasta ári er hann spilaði sem lánsmaður hjá Monaco, en Rafa Benitez, stjóri Liverpool, leitar nú logandi ljósi að framherja til að fylla skarð Djibril Cissé sem verður frá út tímabilið. Morientes sagði: "Að spila fyrir Liverpool myndi vera heiður fyrir hvaða leikmann sem er. Þeir hafa frábæran stjóra í Benitez sem ég hef alltaf haft mikið álit á. En það er ennþá langt í land. Þó ég viti af áhuga Liverpool, þá hef ég ekki ennþá talað beint við Benitez og því eru hlutirnir ennþá á byrjunarstigi".