Fimmtíu féllu í tveimur árásum

Um fimmtíu manns létu lífið í Írak í gær. Meirihluti fólksins féll þegar bandarískar herflugvélar gerðu loftárásir á hús í Falluja þar sem yfirstjórn Bandaríkjahers í Írak sagði vígamenn hafast við. Konur og börn voru þó nær helmingur þeirra sem féllu þar. Þá féllu fimm í sprengjutilræði sem var gert í Bagdad. Sautján börn voru í hópi þeirra sem létust í loftárásinni í Falluja og tvær konur meðal þeirra 27 sem særðust að sögn heilbrigðisyfirvalda. Árásin vakti mikla reiði heimamanna, sem fordæmdu Bandaríkin. Bandarísk hermálayfirvöld vörðu hins vegar árásina og vísuðu til upplýsinga sem þau hefðu fengið um að um það bil 60 vígamenn hefðu fallið í árásinni. Bandaríkjaher hefur ekki haft hermenn í Falluja frá því bardögum um borgina lauk fyrir nokkrum mánuðum. Trúarleiðtogar notuðu hátalarakerfi Falluja-moskunnar til að hvetja fólk til að gefa blóð. Vígamenn hafa búið um sig í Falluja síðustu mánuði og notað borgina sem stökkpall til árása á bandarískar hersveitir sem hafa herbúðir í nágrenninu.