Teiknimyndasófasett bestu kaupin

"Bestu kaupin eru pottþétt sófasett sem ég keypti í Húsgagnalagernum fyrir margt löngu," segir Berglind Björk Jónasdóttir, Borgardóttir með meiru. "Þetta er svona gamaldags, amerískt með svuntu, ekta teiknimyndasófasett," segir hún og skellihlær. Berglind segist hafa fengið settið á verði eins stóls sem hafi óneitanlega verið vel sloppið. "Jafnvel þó áklæðið væri röndótt og frekar ljótt og enginn annar hafi kært sig um það. En það hefur dugað mér vel síðan þó ég auglýsi hér með eftir nýju áklæði." Berglind segist ekkert vera brjálæðislega upptekin af að gera góð kaup, en hún getur ekki stillt sig um að segja frá því hvað hún græddi ofboðslega þegar hún tók að sér blaðamennsku fyrir NBC-sjónvarpsstöðina. "Það var þegar Reagan og Gorbatsjov komu hingað. Ég var einstæð móðir og átti ekki bót fyrir boruna á mér. Ég samdi um einhver laun í upphafi en þegar upp var staðið borguðu þeir mér tvöfalt meira. Svo tók ég viðtal á barnum á Hótel Loftleiðum við einhvern sem ég man ekki fyrir mitt litla líf hver var, en NBC-mönnum fannst teppið á gólfinu ómögulegt og keyptu nýtt. Ég fékk svo að eiga teppið, sem dugði á alla íbúðina mína, og átti það í mörg ár," segir Berglind og auglýsir jafnframt eftir svona frábærum vinnuveitendum.