Vextir á íbúðalánum

Greiningardeild Íslandsbanka telur sennilegt að vextir á nýju íbúðalánunum verði á bilinu 4,5 prósent til 4,8 prósent eftir fyrsta íbúðabréfaútboðið. Þetta byggja þeir á ávöxtunarkröfu á markaði í dag. Að sögn greiningardeildar eru vaxtakjör íbúðalána í efri mörkum þess sem hægt er að búast við eftir fyrsta íbúðabréfaútboðið sem verður um miðjan júlí. Hægt er að áætla framtíðarvaxtaálag Íbúðalánasjóðs út frá vöxtunum sem íbúðalánin bera í dag. Til viðbótar við ávöxtunarkröfu sem gerð verður til bréfanna í fyrsta útboðinu mun Íbúðalánasjóður leggja á vaxtaálag vegna rekstrarkostnaðar, útlánataps og áhættustýringar sjóðsins.