Willum Þór þjálfar KR-liðið næstu tvö árin

KR-ingar staðfestu í dag verst geymda leyndarmál íslenska fótboltans á blaðamannafundi út í KR.  

Willum Þór Þórsson þjálfar KR áfram en hann tók við liðinu af Bjarna Guðjónssyni eftir slaka byrjun og fór með liðið upp um sjö sæti og alla leið í Evrópusæti.

Willum Þór gerir tveggja ára samning við Vesturbæjarfélagið og Arnar Bergmann Gunnlaugsson verður áfram aðstoðarmaður hans.

Willum Þór þjálfaði KR einnig á árunum 2002 til 2004 en liðið varð þá Íslandsmeistari tvö fyrstu tímabil hans með liðið.

Willum Þór hafði síðan þjálfað Val, Keflavík og Leikni auk þess að komast inn á þing fyrir Framsóknarflokkinn í millitíðinni.

KR-liðið vann 9 af 13 leikjum sínum og tapaði aðeins tveimur eftir að Willum Þór tók við í lok júní. KR vann aðeins 2 af fyrstu 9 leikjum sínum undir stjórn Bjarna Guðjónssonar.

Sumarið 2016 verður þrettánda tímabil Willums Þórs Þórssonar sem þjálfara í efstu deild en hann hefur stýrt alls liðum í 214 leikjum í efstu deild.  Willum Þór hefur stýrt KR-liðinu í 67 af þessum leikjum.

Willum hefur unnið fjóra stóra titla sem þjálfari, þrjá Íslandsmeistaratitla (KR 2002 og 2003, Valur 2007) og bikarmeistaratitil með Val 2005.