Val­gerður fer aftur frá SÁÁ

RÚV greindi fyrst frá. Valgerður sagði upp störfum í september eftir að starfslokasamningur var gerður við fyrrverandi forstjóra SÁÁ, hefur verið gagnrýnin á stjórn samtakanna og sakað hana um óeðlileg afskipti af heilbrigðisstarfseminni. 

„Það hefur ekkert breyst. Ég sem sagt kom til baka þarna af því að það var verið að stofna þarna einhverja millistjórn en þetta tekur allt lengri tíma. Ég er búin að koma þarna inn núna sem sagt í þrjár vikur að aðstoða og ekkert þörf á því að ég sé þarna áfram.“

Í lok september sagði Valgerður þetta tímabundna ráðstöfun til að tryggja vinnufrið við endurskoðun samnings SÁÁ við Sjúkratryggingar. Jón Áki Jensson var ráðinn tímabundið sem framkvæmdastjóri lækninga eftir uppsögn Valgerðar en sagði svo starfi sínu lausu eftir tvær vikur í starfi. Valgerður segist hafa starfað síðustu vikur sem „læknir á gólfinu“.

Sérðu ekki fram á að sækjast eftir því að snúa þarna aftur?

„Jújú, það hefur ekkert breyst hjá mér. Það er bara allt eins. Ég vil helst ekki vinna neins staðar annars staðar en ég vil vinna með því fólki sem við erum búin að byggja upp þarna síðustu árin. Kannski á eitthvað eftir að breytast, ég er ekkert að segja það. En ég er allavega ekki áfram að vinna á gólfinu, ég er búin að vera í þrjár vikur til þess að styðja við starfsfólkið. Það var svona svolítið erfið staða á þessum tíma.“

Finnst þér eitthvað hafa verið brugðist við þínum athugasemdum, annarra og fyrrverandi stjórnenda?

„Nei, ekkert. Af hálfu stjórnar SÁÁ hefur allt verið óbreytt. Mér finnst það svolítið ótrúlegt.“

Valgerður segir að hægt hafi verið að taka fleiri sjúklinga inn á Vog á síðustu vikum en vísar að öðru leyti á stjórnendur sjúkrahússins. Áður var greint frá því að Vogur starfaði einungis á um helmingsafköstum á meðan biðlisti væri eftir meðferðarþjónustu. Um tíma voru engir nýir sjúklingar teknir inn vegna manneklu og einkum skorts á læknum. 

Valgerður hefur sakað framkvæmdastjórn SÁÁ um að hafa bolað Ragnheiði Huldu Friðriksdóttur, fyrrverandi forstjóra SÁÁ, úr starfi. Eftir brotthvarf hennar sögðu bæði Valgerður og Þóra Björk Ingólfsdóttir, fagstjóri á meðferðarstöðinni Vík, upp störfum. Báðar hafa sakað sömu stjórn um óeðlileg afskipti af faglegri heilbrigðisstarfsemi SÁÁ. Formaður stjórnar SÁÁ hefur vísað báðum ásökunum á bug. 

Fréttin er í vinnslu.