Goretzka mættur til Villa

Hinn 31 árs gamli Goretzka kemur frítt til Villa eftir að samningur hans við Bayern rann út í sumar.

Villa hefur misst fjölda sterkra leikmanna í sumar og þurfti nauðsynlega á kröftugum og góðum miðjumanni að halda eftir að Amadou Onana meiddist í hné með belgíska landsliðinu á HM.

Goretzka var í lykilhlutverki á miklum góðæristímum hjá Bayern en hlutverk hans hefur hins vegar verið mun minna síðustu ár, undir stjórn Vincent Kompany. Hann hefur þó á ferilskránni að hafa unnið sjö Þýskalandsmeistaratitla, þrjá bikarmeistaratitla og Evrópumeistaratitilinn árið 2020.

Alls lék Goretzka 312 leiki fyrir Bayern og skoraði í þeim 51 mark, á átta árum með þýska stórveldinu. Þá hefur hann spilað 73 landsleiki fyrir Þýskaland, meðal annars þrjá leiki á HM í sumar.

Villa-menn, sem eru einnig að landa framherjanum Nicolas Jackson frá Chelsea, hófu leiktíðina skelfilega um síðustu helgi þegar þeir steinlágu gegn Brighton á útivelli, 4-0. Þeir eiga ekki auðveldara verkefni fyrir höndum á mánudagskvöld þegar þeir taka á móti meisturum Arsenal. 

Villa hafnaði í 4. sæti úrvalsdeildarinnar á síðustu leiktíð og er því með í Meistaradeild Evrópu í haust og fær að vita mótherja sína þegar dregið verður nú síðdegis.