Infantino beðinn um að mæta ekki á barnamót sem FIFA fjár­magnar

Infantino barst bréf frá Victor Montagliani, forseta CONCACAF knattspyrnusambandsins, sem óskaði eftir því að forseti FIFA myndi ekki mæta á mótið eins og fyrirhugað hafði verið. Um er að ræða ungmennamót fyrir leikmenn undir fjórtán ára sem er fjármagnað af FIFA.

Sky Sports greindi fyrst frá málinu í morgun. The Athletic hefur nú tekið undir þá umfjöllun og kveðst hafa bréfið sem Montagliani sendi Infantino undir höndum.

„Ég tel að í ljósi stjórnarkreppunnar sem ríkir hjá FIFA vegna umdeildrar tillögu þinnar um FIFA Forward Enterprise muni fjölmiðlar einblína á þetta ástand, sem mun því miður draga verulega úr umfangi unglingakeppni CFU,“ stóð í bréfi Kanadamannsins samkvæmt The Athletic.

Montagliani er mögulegur kandídat í forsetaframboð gegn Infantino á næsta ársþingi FIFA og einn af þeim sem skrifaði undir opið bréf þar sem lýst var yfir vantrausti á forsetanum.

Infantino er samt mættur til dóminíkanska lýðveldisins og fundaði með Jose Deschamps, forseta knattspyrnusambandsins þar í landi, í gær ásamt öðrum stjórnmálamönnum.