Sveitar­fé­lögin séu ekki söku­dólgurinn

Seðlabankinn beindi spjótum sínum að hinu opinbera við ákvörðun vaxtahækkunarinnar á miðvikudaginn. Seðlabankastjóri sagði aukna verðbólgu að miklu leyti skýrast af hækkun opinberra gjalda og að opinberum starfsmönnum hefði fjölgað. Bankinn hefur jafnframt varað við sjálfvirkum gjaldskrárhækkunum í takt við verðlag. 

Stýrivextir voru hækkaðir um fjórðung úr prósentustigi í á miðvikudag og eru nú átta prósent. Illa hefur gengið að draga úr verðbólgunni sem mældist 5,3 prósent í júlí. 

Kristrún Frostadóttir, forsætisráðherra, sagði í morgun að gjaldskrárhækkanir ríkisins sjáist ekki í tölum Hagstofunnar og Daði Már Kristófersson sagði að opinberum starfsmönnum ríkisins hefði ekki fjölgað og benti á sveitarfélögin. 

Jón Björn Hákonarson, formaður Sambands íslenskra sveitarfélaga, segir vel hafa gengið að standa við það markmið að hækka ekki gjaldskrár sem snerta fjölskyldur og fólk í viðkvæmri stöðu umfram þrjú og hálft prósent. Hann geti ekki greint það að gjaldskrárhækkanir hafi valdið verðbólgu. 

„Sveitarfélögin gerðu betur en það ef við skoðum mælingarnar. Ég er ekki sammála Seðlabankastjóra þarna vegna þess að mörg sveitarfélög hafa stigið lengra, tekið til baka og sett sér markmið á þessu ári. Þannig ég get ekki greint að þetta sé það sem er að valda þessu,“ sagði Jón Björn í myndveri í kvöldfréttum Sýnar. 

Opinberum starfsmönnum fjölgað til að bregðast við biðlistum

Fjölgun opinberra starfsmanna hafi legið fyrir en bregðast þurfti við biðlistum leikskóla og þjónustu sem snertir viðkvæma hópa samfélagsins. Starfsmönnum hafi fjölgað frá janúar til maí á þessu ári. 

„Sannarlega hefur þetta aukist hjá okkur af því við erum auðvitað með þessa mikilvægu nærþjónustu til að samfélagið okkar geti starfað. Og við höfum verið að bregðast við því.“

Munuð þið hvetja sveitarfélög til þess að halda aftur af gjaldskrárhækkunum í núna haust?

„Við sveitarfélögin höfum verið mjög skýr og ég hef fundið það hjá sveitarstjórnarmönnum um allt land að við viljum að þetta sé sameiginlegt verkefni.

Þetta er stórt sameiginlegt verkefni stjórnvalda, vinnumarkaðarins og atvinnulífsins hvernig við spyrnum við og stígum til baka. Við erum ávallt tilbúin til að stíga sáttarskref í þeim efnum. Þetta snertir okkur öll. Þetta verður ekki leyst nema með samvinnu.“