Ætlar að blanda sér í bar­áttuna við Ferrari og Mercedes

McLaren er ríkjandi heimsmeistari bílasmiða og ökumaður þeirra, Lando Norris, er ríkjandi heimsmeistari ökumanna í Formúlu 1. Tímabilið fór þó ekki vel af stað fyrir liðið en bæði Mercedes og Ferrari hafa verið mun hraðari á tímabilinu.

Í ungverska kappakstrinum uppfærði McLaren-liðið bílinn sinn sem sýndi sig í niðurstöðum keppninnar. Lando Norris var hraðastur í tímatökum og vann síðan keppnina. Liðsfélagi hans Oscar Piastri var í öðru sæti kappakstursins þegar gírkassinn hans skemmdist og gat hann ekki klárað keppnina.

Eftir sigurinn þarf Norris að vinna upp 91 stig á Kimi Antonelli í efsta sæti heimsmeistaramótsins. Það virðist vera mikið en á síðasta tímabili náði Max Verstappen, ökumaður Red Bull, að vinna upp 104 stiga mun á Oscar Piastri þegar aðeins níu keppnir voru eftir.

Andrea Stella, liðsstjóri McLaren, er ánægður með árangurinn í ungverska kappakstrinum og mun liðið leggja sig allt fram til að halda góðu gengi áfram.

„Ef við höldum áfram á þessu tímabili eins og við gerðum í Búdapest þá getum við afrekað mikið. Okkur gekk ekki eins vel í byrjun tímabils og við bjuggumst við en við fundum fínar lausnir á þeim vandamálum. Nú þurfum við að halda áfram góðu gengi.“

Það kom óskipulögð mánaðarpása í apríl eftir að fresta þurfti Barein-kappakstrinum og aflýsa þurfti sádí-arabíska kappakstrinum vegna stríðsátaka á svæðunum. McLaren nýtti þennan tíma vel og bætti bílinn sinn töluvert sem skilaði sér loks í síðustu keppni.

Ferrari og Mercedes hafa verið sterkustu liðin á tímabilinu og var McLaren fyrsta liðið utan þeirra beggja til að sækja sigur á tímabilinu. Mögulega mun McLaren-liðið blanda sér í toppbaráttu heimsmeistaramótsins ef það nær að halda áfram góðu gengi eftir sumarfríið.