Willum mættur fyrstur upp á spítala alla daga

Í ítarlegu viðtali við Sýn á dögunum sagði Eygló frá þeim áskorunum sem hún hefur mætt frá því að hún varð Evrópumeistari í fyrra og kjörin íþróttamaður ársins.

Ítrekuð meiðsli hafa reynt á hana en í þeirri stöðu hefur svo til nýstofnuð Afreksmiðstöð Íslands heldur betur sannað gildi sitt fyrir hana. Þá hefur forseti Íþrótta- og Ólympíusambands Íslands, Willum Þór Þórsson, látið sig stöðu Eyglóar varða.

„Willum var með mér alla daga upp á spítala, mætti þegar að ég meiddi mig og var fyrstur alla morgna kominn að kíkja á mig. Ég fékk svo ótrúlega mikinn stuðning frá fólkinu upp í Afreksmiðstöðinni. Þau voru alltaf að hringja, tékka á mér og hjálpuðu mér. Eins eftir á er ég með mitt teymi hjá Afreksmiðstöðinni sem hittist reglulega, tekur stöðuna, kannar hvernig ég hafi það. Þau gripu mig algjörlega.“

„Maður þarf bara að leyfa spítalanum að gera það sem að þau gera best á meðan að ég er þar inni en hvað tekur svo við þegar að ég er komin út. Allt sem tekur við. Beint í að fá sálfræðiaðstoð, hugsa um allt sem var mögulega hægt að gera fyrir mig. Svo eru mánaðarlegir fundir þar sem að við tökum stöðuna, hvort við getum bætt eitthvað. Þetta var bara frábært.

Þetta er bara eins og atvinnumannaumhverfi á að vera.

„Mér finnst þetta bara vera lágmark. Íþróttin mín, ferillinn minn. Þetta er lífið mitt. Allt sem ég hef byggt upp síðustu ár. Maður missir það bara einhvern veginn á augabragði. Það er erfitt að útskýra það að ég fari svona langt niður af því að ég fæ ekki að lyfta lóðum. En fyrir mér er þetta bara allt sem ég vil gera, atvinnan mín og það sem mér finnst skemmtilegast. Maður þarf svo ótrúlega mikla aðstoð þegar maður lendir í svona. Það hjálpaði svo mikið að hafa alla í AMÍ og auðvitað fjölskyldu og vini.“

Brot úr viðtalinu við Eygló má sjá í spilaranum hér fyrir ofan.