Sakar Infantino um fjár­kúgun

„Það er enginn skortur á vandamálum þegar kemur að FIFA“ byrjar Hussein í skrifum sínum þar sem hann rekur vandræði jórdanska landsliðsins og stuðningsmanna þess við að fá vegabréfaáritun við komuna til Bandaríkjanna.

Hann gagnrýnir einnig hátt miðaverð á HM en Jórdanía tók þátt í fyrsta sinn í sumar.

Aðallega kveðst Hussein ósáttur við að knattspyrnusamband Jórdaníu hafi ekki fengið verðlaunafé fyrir að komast í úrslit Arabíubikarsins í desember síðastliðnum.

„Á sama tíma montar FIFA sig af milljörðunum sem það á inn í banka,“ skrifar Hussein.

Hann segir forseta FIFA stunda fjárkúgun til að fá sínu framgengt.

„Í marga mánuði hefur FIFA neitað að hjálpa okkur með þessi mál eða önnur. Svo var mér sagt á HM að ef ég myndi styðja Infantino opinberlega gæti það hjálpað við að slétta úr málum knattspyrnusambandsins.

Við erum stolt af því í Jórdaníu að halda siðferðislegum gildum í heiðri. Við studdum hann ekki áður og munum svo sannarlega ekki gera það núna. Allt þetta mál jafngildir fjárkúgun og við neitum að láta undan henni,“ skrifar Hussein einnig.

FIFA hefur ekki brugðist við fyrirspurnum Reuters um málið.

Ásakanir um fjárkúgun á hendur Infantino koma í kjölfar mikilla vandræða hjá forsetanum, sem situr í sjóðheitu sæti eftir misheppnaða tilraun í síðustu viku til að hleypa utanaðkomandi fjárfestum að FIFA.