Fólk fast í verslunar­mið­stöð eftir skjálftann í Japan

AP-fréttaveitan greinir frá þessu og hefur eftir Kyodo News. Einhverjir eru fastir inn í verslunarmiðstöð, að sögn slökkviliðsins á svæðinu. Tilkynnt var um sprengingu í Aeon-verslunarmiðstöðinni í Kumamoto eftir skjálftann.

Japanska fréttastofan NHK greinir frá því að vitni hafi séð sprengingu og reyk í verslunarmiðstöðinni. Vitnið sá aðra hæð byggingarinnar hrynja og voru nokkrir viðskiptavinir fluttir á sjúkrahús.

Slökkviliðs- og hamfarastjórnunarstofnun Japans staðfesti síðar að önnur hæð „atvinnuhúsnæðis“ hefði hrunið og að margir væru fastir inni.

Rafmagnsleysi víða

Jarðskjálftinn í dag olli „engum skemmdum eða öryggisvandamálum“ í Sendai-kjarnorkuverinu, sem er í um 100 kílómetra fjarlægð frá upptökum skjálftans, að sögn Alþjóðakjarnorkumálastofnunarinnar. Verið starfi áfram en fylgst verði með ástandinu.

Sanae Takaichi, forsætisráðherra Japans, sagði að tilkynningar hefðu borist um fjölda meiðsla og skemmdir á vegum, brúm og byggingum. 

Þá hafi verið tilkynnt um rafmagnsleysi og eldsvoða en lítið væri um nánari upplýsingar. Takaichi hvatti fólk sem væri að elda til að fara varlega með eld og passa sig á glerbrotum en jarðskjálftinn reið yfir rétt fyrir klukkan 16:30 að staðartíma. yfir tólf milljónir manna búa á eyjunni Kyushu. 

Flóðbylgjuviðvörun var í fyrstu gefin út eftir skjálftann en dregin til baka innan við tveimur tímum síðar.

Slökkviliðs- og hamfarastofnun Japans sagði í morgun að engar tilkynningar hefðu borist um skemmdir á stórum opinberum mannvirkjum og innviðum en yfirvöld væru enn að meta umfang tjónsins. Slökkvilið á svæðinu fengu margar tilkynningar um eldsvoða og skemmdir á heimilum.

Fréttin er í vinnslu.