„Það fyrsta sem sést er rassinn á mér“

Það eru hin 23 ára gamla Maja Åskagog og hin 26 ára Julia Henriksson sem fagna ákvörðuninni í samtali við Aftonbladet.

„Það er gott að áherslan verði meira á það sem við gerum en hvernig við lítum út,“ sagði Maja Åskag.

Fyrr í sumar settu Frjálsíþróttasamband Evrópu (EA) og Samband evrópskra sjónvarpsstöðva (EBU) nýjar leiðbeiningar fyrir sjónvarpsútsendingar sem eiga að vinna gegn kynferðislegri birtingu á frjálsíþróttakonum.

„Þetta er frábært og veitir okkur stelpunum sem keppum öryggi. Maður vonar að þessu verði fylgt og að allar stelpur finni fyrir aðeins meira öryggi,“ sagði Åskag enn fremur.

Liðsfélagi hennar í sænska landsliðinu, spretthlauparinn Julia Henriksson, tekur í sama streng:

„Það er galið að við þurfum á þessu að halda. En nú er staðan þannig að mér finnst gott að þetta hafi verið tekið upp,“ sagði Henriksson.

Bæði Åskag og Henriksson kepptu á sænska meistaramótinu í frjálsum íþróttum um helgina. Á laugardaginn vann Åskag gull í langstökki.

Báðar íþróttakonurnar kannast við vandamálið en hvorug þeirra telur sig hafa orðið fyrir skaða af því áður.

„Mér finnst þetta ekki erfitt en ég veit að þetta er svona. Þegar maður horfir á endursýningu af stökki þá er það fyrsta sem sést er rassinn á mér í hægri endursýningu. Auðvitað sjást líkamar okkar þegar við stökkvum og erum ekki í miklum fötum, en það er kannski ekki nauðsynlegt að þysja inn á það,“ sagði Åskag.