FIFA rukkar tíu þúsund krónur fyrir að mæta á blaða­manna­fund

FIFA mun halda blaðamannafundinn fyrir úrslitaleik heimsmeistaramótsins fyrir framan áhorfendur, en þeir þurfa að greiða yfir 80 Bandaríkjadali, meira en tíu þúsund íslenskar krónur, til að horfa á þjálfara og leikmenn liðanna tveggja sem keppa til úrslita, ásamt Gianni Infantino, forseta FIFA, ræða um leikinn á sunnudag í New Jersey.

Blaðamannafundir fyrir stóra úrslitaleiki í fótbolta, þar á meðal heimsmeistaramótið og Meistaradeildina, eru venjulega haldnir daginn fyrir leik og eingöngu fyrir fjölmiðla og útsendingaraðila.

En FIFA leyfir takmörkuðum fjölda áhorfenda aðgang að viðburðinum í Javits Center í New York-borg á föstudegi, tveimur dögum fyrir leikinn, og sleppir hefðbundnum blaðamannafundi daginn fyrir leik.

Blaðamannafundurinn er haldinn af Fanatics, viðskiptafélaga FIFA, sem hluti af fjögurra daga Fanatics Fest-viðburði þeirra, þar sem aðdáendur geta einnig greitt fyrir eiginhandaráritanir og myndatökur með íþróttastjörnum.

Fjögurra daga fjölskyldupassi er seldur á 857 Bandaríkjadali (108 þúsund íslenskar krónur) en eins dags passi fyrir fullorðna á blaðamannafundinn á föstudag kostar 81,54 Bandaríkjadali (10.252 íslenskar krónur).

Þjálfarar og leikmenn keppnisliðanna munu mæta á viðburðinn en aðdáendur munu aðeins geta fylgst með og ekki spurt þátttakendur spurninga.

Í auglýsingu fyrir viðburðinn sagði Fanatics: „Aðdáendur munu fá það fágæta tækifæri að sjá bæði úrslitaleiksliðin stíga á svið aðeins dögum fyrir úrslitaleik heimsmeistaramótsins og heyra beint frá leikmönnum og fulltrúum liðanna þegar þeir undirbúa sig fyrir stærsta leik íþróttarinnar.“

„Sérstakir gestir: Gianni Infantino og fleiri væntanlegir.“

Evrópumeistarar Spánar munu mæta sigurvegurum undanúrslitaleiks Englands og Argentínu á miðvikudag í úrslitaleik heimsmeistaramótsins á MetLife-leikvanginum á sunnudag.