Goð­sögn í alpa­greinum hand­tekin með „töfrasveppi“ í fórum sínum

Það var fyrr í júní sem alpastjarnan var handtekin í bandaríska fylkinu Idaho fyrir nokkur fíkniefnalagabrot. Miller var síðar sleppt gegn tryggingu upp á tæplega 50.000 norskar krónur.

Bandarískir miðlar eins og ESPN, TMZ og ABC fjalla allir um atvikið.

Miller þarf nú að mæta á undirbúningsfund fyrir réttarhöld í lok júlí. Aðfaranótt miðvikudags birti hann færslu á Instagram þar sem atburðarásinni er lýst á þennan hátt:

„Lögreglan stöðvaði mig í tengslum við framúrakstur á hraðbrautinni. Vinurinn sem ég ferðaðist með var með kannabis og kannabispípu sem ég vissi ekki af. Við sýndum lögreglunni fulla samvinnu. Ég vona að málið verði fellt niður þegar allar staðreyndir eru komnar á borðið,“ sagði Miller.

Á Instagram-síðu sinni minnist Miller ekkert á ofskynjunarsveppina, oft kallaða „töfrasveppi“, sem hann á samkvæmt fjölmiðlum einnig að hafa haft í vörslu sinni. ABC byggir upplýsingar sínar á dómskjölum.

Bode Miller hefur unnið sex Ólympíuverðlaun. Hann vann sín fyrstu árið 2002 og þau síðustu árið 2014. Alpastjarnan hefur einnig unnið fern gull á heimsmeistaramótum og tvo heildarsigra í heimsbikarnum.

Bandaríkjamaðurinn lagði skíðaferilinn á hilluna árið 2017.