„Þetta hefði ekki getað endað betur“

Arnar hefur upplifað tímana tvenna á sínum sex árum hjá félaginu en ekki fagnað meistaratitli fyrr en um helgina.

Melsungen vann Evrópudeildina eftir sigur gegn Flensburg í undanúrslitum og hádramatískan eins marks sigur gegn Kiel í úrslitaleiknum. Arnar skoraði tvö mörk í báðum leikjum. 

„Hvað á maður að segja? Þetta var bara yndislegt, ólýsandi,“ sagði Arnar hress í viðtali sem var sýnt í Sportpakka Sýnar í gærkvöldi.

Miðað við stöðu þessara þýsku liða í deildinni heima fyrir var Melsungen klárlega ekki talið sigurstranglegt gegn Flensburg og Kiel.

„Alls ekki. Við vorum underdogs en við vorum þarna í fyrra líka, þannig að við vorum með reynsluna og okkur langaði rosa mikið til að sigra þetta í ár. En jú það má alveg segja að við höfum verið léttir underdogs þarna.“

Þetta var líka ekki bara fyrsti titill Arnars hjá Melsungen heldur fyrsti titillinn í sögu þessa félags, sem hefur verið í mikilli uppbyggingu undanfarin ár.

„Það var búið að vera mikið af róteringum í liðinu en undanfarin þrjú ár hefur sami kjarninn verið. Og þessi kjarni hefur verið að komast í Final Four helgar og svona. Það er mjög mikilvægt í svona stórum og löngum keppnum að halda í sama kjarna.“

Línumaðurinn mun svo vitja nýrra ævintýra hjá Flensburg á næsta tímabili en fékk hina fullkomna kveðjustund.

„Þetta hefði ekki getað endað betur. Maður er búinn að vera hérna í sex ár, þannig að þetta er langur tími. Frábært að enda tímabilið og minn tíma hér hjá Melsungen með einum titli, það bara gerist ekki betra.“

Reynir Þór Stefánsson er einnig leikmaður Melsungen og varð Evrópudeildarmeistari um helgina. Hann er á sínu fyrsta tímabili hjá félaginu en verður ekki lengi eini Íslendingurinn í Melsungen. Kærasta hans, handboltakonan Alfa Brá Oddsdóttir Hagalín, er á leið út í atvinnumennsku.