McGregor snýr aftur í búrið og berst við Holloway í júlí

Ekki er um titilbardaga að ræða þó þeir séu báðir fyrrum UFC meistarar. Þeir hafa einu sinni mæst áður, snemma á ferlinum. McGregor vann bardagann, sem var aðeins annar bardaginn á UFC ferli hans, í júlí 2013, á dómaraákvörðun.

McGregor hefur ekki barist síðan þann 10. júlí 2021 þegar hann fótbrotnaði í tapi gegn Dustin Poirier. Hann snýr því aftur í hringinn akkúrat einum degi frá því að fimm ár verða liðin frá síðasta bardaga.

Síðast þegar McGregor var með skipulagðan bardaga, gegn Michael Chandler í júní 2024, dró hann sig úr keppni vegna meiðsla í tánni.

Hann hefur glímt við ýmis vandamál í einkalífinu frá því þá og komist í kast við lögin margoft. 

Í nóvember 2024 var hann sakfelldur fyrir kynferðisofbeldi sem átti sér stað árið 2018.

McGregor var á sínum tíma fyrstur til að halda á meistarabelti í tveimur þyngdarflokkum í UFC samtímis, árið 2016. Hann mundaði svo hnefaleikahanskana árið 2017 gegn Floyd Mayweather og hefur aðeins barist fjórum sinnum í UFC síðan, og tapað þrisvar.

Holloway er fyrrum fjaðurvigtarmeistari en hefur tekið tvo bardaga í léttvigtinni, unnið einn og tapað einum.

Sama kvöld, þann 11. júlí, mun Paddy Pimblett snúa aftur í hringinn eftir að hafa tapað í fyrsta sinn á ferlinum í janúar og berjast við Benoit Saint Denis.