Svekktur eftir næst­besta tíma Ís­lendings: „Eins og að ég fái hníf í magann“

Hlynur hljóp á 2:15:30 klukkutímum og hafnaði í 12. sæti í Kaupmannahafnarmaraþoninu í dag og var þriðji fljótastur af þeim Evrópubúum sem kepptu.

Eftir að hafa slegið Íslandsmetið í hálfmaraþoni í mars var hann hins vegar staðráðinn í að bæta Íslandsmetið sitt í maraþoni í dag en það er 2:13:37 og setti Hlynur það í sínu fyrsta maraþoni, í Dresden í Þýskalandi fyrir fimm árum.

Í samtali við RÚV eftir hlaupið sagðist Hlynur hafa verið í formi til að slá metið en hann fékk skelfilegan verk í magann sem dró verulega úr hraðanum í lokin.

Formið nógu gott til að slá þetta met

„Ég var á góðu tempói alveg þar til það voru 6-7 kílómetrar eftir. En ég er búinn að vera í basli með magann á mér eftir 30 kílómetra og þarf að finna út hvað gerist. Það er eins og að ég fái hníf í magann þegar það eru svona 20-30 mínútur eftir. Þá hætti ég bara að hugsa um tímann og í þetta skiptið vildi ég bara koma mér í markið og reyndi að klára eins vel og ég gat,“ sagði Hlynur við RÚV.

Hann er staðráðinn í að bæta metið síðar enda með alla burði til þess:

„Formið er nógu gott til að slá þetta Íslandsmet en það er eitthvað fast með magann á mér sem ég þarf að finna út úr og get lagað fyrir næsta skipti.“

Hlynur þarf nú að bíða þar til á miðvikudaginn, þegar nýr styrkleikalisti Evrópu verður birtur, til að vita hvort að hann fær sæti á Evrópumótinu í Birmingham í ágúst.