Alex Zanardi látinn

Valur Páll Eiríksson skrifar 2. maí 2026 11:00

Segja má að Zanardi sé þjóðhetja á Ítalíu og táknmynd styrks og þrautseigju við mótlæti. Hans verður minnst með mínútu þögn á öllum íþróttaviðburðum um helgina. Massimo Bertolini/NurPhoto via Getty Images

Ítalinn Alex Zanardi er látinn 59 ára að aldri. Zanardi átti stórmerkilegan feril, fyrst sem ökuþór og síðar sem gullverðlaunahafi á Ólympíumóti fatlaðra, eftir alvarlegt slys sem breyttu lífi hans.

Fjölskylda Zanardi greindi frá tíðindunum í morgun, að hann hafi látist á föstudagskvöld umvafinn ástvinum. Í tilkynningunni voru dánarorsök ekki gefin upp.

„Ítalía missir mikinn meistara og einstakan mann, sem er fær um að breyta hverri áskorun lífsins í lexíu í hugrekki, styrk og reisn,“ sagði Giorgia Meloni, forsætisráðherra Ítalíu, á miðlinum X.

Zanardi hefur ekki verið samur eftir handhjólaslys sem hann varð fyrir árið 2020 þar sem hann lenti á trukki sem kom úr andstæðri átt við keppni í Toscana. Læknar settu hann í dá vegna alvarlegra áverka á heila sökum slyssins.

20 árum fyrr hafði hann misst báða fætur í kappakstursslysi. Zanardi hafði unnið CART-mótaröðina árin 1997 og 1998 og sneri aftur í þá mótaröð eftir stutt stopp í Formúlu 1.

Zanardi hefur unnið til verðlauna á ÓL fatlaðra og í járnkarli.Bryn Lennon/Getty Images for IRONMAN

Hann lenti í hræðilegu slysi í keppni helgina eftir árásirnar á tvíburaturnana í september 2001. Við tók löng endurhæfing og Zanardi hannaði eigin gervifætur sem hann grínaðist með að hefðu gert hann hávaxnari.

Með þeim lærði hann að ganga aftur og sneri sér að handhjólreiðum. Hann varð á meðal betri íþróttamanna heims og vann til fjögurra gullverðlauna og tveggja silfurverðlauna á Ólympíumótum fatlaðra árin 2012 og 2016.

Þá keppti hann í New York-maraþoninu og setti met í járnkarli.

Hann sneri aftur á ökubrautina árið 2019 til að keppa fyrir BMW í Rolex 24 keppninni á Daytona-brautinni vestanhafs. Hann keppti þar án gerviútlima og má segja að hann hafi verið virtasti keppandi brautarinnar, sem þó innihélt Formúlu 1-heimsmeistarann Fernando Alonso.

Alþjóðaaksturssambandið, FIA, sagði á X að kappakstursferill Zanardi og „ferðalag frá slysi sem breytti lífi hans til gullverðlauna á Ólympíuleikum fatlaðra gerði hann að einum dáðasta keppanda íþróttaheimsins og varanlegu tákni hugrekkis og ákveðni.“

Zanardi býr sig undir kappakstur fyrir BMW árið 2019.Andrea Diodato/NurPhoto via Getty Images

Zanardi var þekktur fyrir smitandi bros sitt, mikla persónutöfra og skrautlegar frásagnir. Frans páfi lofaði Zanardi sérstaklega eftir slys hans árið 2020, styrk hans við mótlæti og sendi handskrifað bréf til hans og fjölskyldu hans.

Ólympíunefnd Ítalíu hefur kallað eftir mínútu þögn á öllum íþróttaviðburðum í landinu um helgina vegna fráfalls Zanardi.

Andlát Hjólreiðar Ólympíumót fatlaðra Ítalía