Segir pabba hafa hlaupið á sig

Vonn fór yfir stöðuna í viðtölum við AP og morgunþátt CBS í dag en þessi 41 árs gamla, bandaríska skíðadrottning var svo hætt komin eftir slysið, í brunkeppni leikanna, að hætta var á því að hún missti annan fótinn.

Hún keppti á leikunum þrátt fyrir að hafa slitið krossband í hné skömmu áður en þrátt fyrir þau meiðsli og slysið heldur hún því opnu að snúa aftur til keppni. Pabbi hennar, Alan Kildow, hafði látið hafa eftir sér að ef hann fengi einhverju ráðið þá myndi Vonn aldrei keppa aftur.

„Pabbi minn hljóp á sig. Hann ætti að vera búinn að læra það að ef mér er sagt að ég geti ekki eitthvað, þá mun ég gera það,“ sagði Vonn hress í þætti CBS.

„Ég vil halda áfram að skíða, sama hvort það verður í keppni eða ekki. Ég elska fjöllin og þetta hefur alltaf verið mín ástríða,“ bætti hún við.

Vonn hafði verið hætt keppni í sex ár áður en hún tók keppnisskíðin fram að nýju og kom sér í slíkt keppnisform að hún var talin líkleg til að bæta við Ólympíuverðlaunin þrjú sem hún á í sínu safni. Hún var efst í heimsbikarnum í bruni fyrir slysið í febrúar og hafði ekki endað neðar en í 4. sæti í neinni af keppnum vetrarins.

Það verður hins vegar að koma í ljós hvort að önnur svo ævintýraleg endurkoma er í spilunum.

„Ég vil ekki taka neina ákvörðun of fljótt eða svo mikið sem velta því fyrir mér hvað mun verða. Kannski hætti ég. Kannski keppi ég aldrei aftur og það væri bara í fínasta lagi en ég er ekki í neinu ástandi til þess andlega að taka slíka ákvörðun núna,“ sagði Vonn.