„Langir fætur hjálpa við að sparka í hausinn á þeim“

Guðmundur Flóki, eða einfaldlega Flóki, hefur tekið ótrúlegum framförum að undanförnu. Hann byrjaði bara að keppa í fullorðinsflokki í fyrra, þá sautján ára gamall, en hefur sópað til sín verðlaunum og er á ógnarhraða kominn í fremstu röð á heimsvísu.

„Þetta er mjög tæknileg íþrótt og aðallega strategísk. Maður þarf að bregðast við og vita hvað maður á að gera, búa til sinn stíl líka. Mér finnst það svo gaman, það er enginn keppandi eins og einhver annar. Maður þarf að vinna með það sem maður hefur. Hvort sem það er snerpa, þungi, styrkur, hæðin, allt.“

Sjá einnig:  Sautján ára Íslendingur vann brons í fullorðinsflokki

Hvernig er þinn stíll?

„Ég er nokkuð hávaxinn þannig að ég held mig svolítið frá andstæðingnum. Held fjarlægðinni og er mikið í árás, langir fætur hjálpa við að sparka í hausinn á þeim og í brynjuna.“

Nauðsynlegt að undirbúa sig erlendis

Með þessum lappalanga stíl náði Flóki mögnuðum árangri í vetur. Hann vann sér inn sæti á Evrópumótinu í Munchen og á fyrsta Grand Prix móti ársins sem verður haldið í Róm í júní.

Þar má segja að Flóki mæti á stærsta sviðið í taekwondo, aðeins þeir 32 bestu í hverjum þyngdarflokki komast að og því mikilvægt að undirbúningurinn sé með besta móti.

„Ég er búinn að fara í nokkrar æfingabúðir í ár og æfa með norska, sænska og franska landsliðinu. Það hefur gengið vel og ég er í góðu formi. Við erum bara þrjú hérna á Íslandi sem eru í landsliðinu. Ég keppi í -80 kg. þyngdarflokki en aðal æfingafélagi minn er í -68 kg. flokknum, þannig að það er nauðsynlegt að fara út og æfa með stærri strákum.“

Væri gaman að komast á pall

Eftir þennan góða undirbúning kemur svo að stóru stundunum, EM og Grand Prix.

„Ég er rosa spenntur fyrir báðum mótum. Maður fer og gerir sitt besta, svo sér maður bara hver útkoman verður. Það væri gaman að komast á pall, ég get ekki neitað því.“

Viðtal við Guðmund Flóka var sýnt í Sportpakka Sýnar í gærkvöldi og má sjá í spilaranum að ofan.