Far­þegar sjá ekki fólkið sem gegnumlýsir far­angurinn

Í kvöldfréttum Sýnar og þætti Flugþjóðarinnar um Keflavíkurflugvöll kynnumst við því sem gerist í bakrýmum flugstöðvarinnar sem farþegar sjá yfirleitt ekki, meðal annars vopnaleitinni. Hún er það fyrsta sem venjulega mætir farþegum eftir innritun í flug. Farþegar skila af sér handfarangri til gegnumlýsingar og ganga svo sjálfir í gegnum slíkt tæki.

Það eru ekki aðeins flugfarþegar sem þurfa að fara í gegnum öryggisleit á Keflavíkurflugvelli. Varningur þjónustuaðila, meira að segja bjórkútarnir fyrir veitingastaðina, er gegnumlýstur áður en honum er hleypt inn á öryggissvæðið.

Öryggisleitin kallar á mikinn mannskap.

„Við erum 150 núna yfir veturinn en á sumrin erum við um það bil 200 til 250 manns, sem vinna hérna á sumrin,“ segir Reimar Jensson, vaktstjóri í öryggisleit Keflavíkurflugvallar, hér í sjónvarpsfréttinni:

Reyndar sjá farþegar bara hluta starfsmanna öryggisleitar. Í rými baka til situr hópur fólks við tölvuskjái að skoða innihaldið í töskunum.

-En hverju er helst verið að leita að?

„Bara einhverju sem ógnar fluginu sjálfu. Sprengjum og hættulegum efnum, vopnum,“ svarar Reimar.

Starfsmennirnir í bakrýminu fylgjast einnig með stóru töskunum sem farþegar innrituðu en þær eru gegnumlýstar á færiböndunum.

-En hvað er það sem farþegar helst klikka á að reyna að koma í gegnum öryggisleitina?

„Vökvi til dæmis, sem er yfir 100 millilítra. Hann má ekki fara í gegn hérna. Hnífar og verkfæri sem eru of stór eða of beitt til að fara í gegn.“

Hluti farþega lendir í úrtaksleit og þá er þreifað á fólki. Er fólk ekki viðkvæmt fyrir því?

„Nei, nei. Flestir taka þátt og taka vel í þetta. Sumir skilja þetta ekki en það er bara partur af þessu,“ svarar Reimar.

Það á raunar enginn hlutur að sleppa inn án þess að fara í tékk. Aðföng fyrir sölubúðir og veitingastaði fara einnig í gegnum öryggisleit. Þannig fylgjumst við með því þegar bjórkútum er rennt inn í gegnumlýsingartæki.

Starfsmenn flugvallarins sem og áhafnir flugvéla fara í gegnum öryggisskoðun í sérstökum starfsmannahliðum. Allir þurfa að lúta reglunum.

„Og það eru sumir sem gera það ekki. Við höfum neitað fólki að komast í gegn,“ segir Rizza Katrín Thomasdóttir flugverndarstarfsmaður.

„Sumt fólk er bara með stæla eða er ekki að fylgja reglum. Það er bara, því miður, höfum við neitað fólki að koma í gegn,“ segir Rizza Katrín.

Fjallað er um Keflavíkurflugvöll í nítjánda þætti Flugþjóðarinnar. Áskrifendur geta séð alla þættina hvenær sem er á streymisveitunni Sýn+.

Í kynningarstiklu má sjá dæmi um efni þáttanna sjö í þriðju seríu Flugþjóðarinnar: