Elísa­bet stór­bætti Ís­lands­metið og Júlía hljóp annað met Guð­rúnar uppi

Elísabet Rut Rúnarsdóttir kastaði sleggjunni 72,89 metra um helgina.

Fyrra Íslandsmetið var upp á 71,41 metra, í sameiginlegri eigu Elísabetar og Guðrúnar Karítasar Hallgrímsdóttur. Elísabet stórbætti því metið, um tæplega einn og hálfan metra, og deilir metinu ekki lengur með Guðrúnu.

Með þessum árangri hefur Elísabet jafnframt tryggt sér sæti á Evrópumótinu í Birmingham í sumar, sem er stór áfangi og skýr staðfesting á því að hún tilheyrir fremsta hópi íslensks frjálsíþróttafólks um þessar mundir.

Júlía Kristín heldur áfram að hirða met af Guðrúnu 

Júlía Kristín Jóhannesdóttir hljóp 100 metra grindahlaup á 13,02 sekúndum. Með því bætti hún þrjátíu ára gamalt Íslandsmet Guðrúnar Arnardóttur, sem hljóp á 13,18 sekúndum í Lexington í Kentucky árið 1996.

Árangur Júlíu kemur ekki upp úr þurru. Hún átti afar sterkt innanhússtímabil þar sem hún bætti einnig þrjátíu ára gamalt Íslandsmet Guðrúnar Arnardóttur í 60 metra grindahlaupi. Júlía átti síðan eftir að bæta Íslandsmetið alls fjórum sinnum til viðbótar í vetur.