Úr­slit Extra-leikanna: „Djöfull er ég pirraður og svekktur“

Fyrir skautahlaupið voru þeir Andri og Tómas jafnir að stigum, 11-11. Það var því allt undir á svellinu í Egilshöllinni.

„Eruði að grínast hvað þetta er sleipt?“ sagði Andri þegar hann gekk út á svellið. Þá kom í ljós að það blæddi úr puttunum á honum en Nablinn hafði skorið sig við að setja á sig hjálminn.

Verkefnið var á pappír frekar einfalt en þeir Andri og Tómas áttu að skauta fram og til baka án nokkurra hjálpartækja. Framkvæmdin reyndist þó allt annað en einföld.

Keppnin var spennandi en svo fór að Tómas kom á undan í mark og tryggði sér þar með sigurinn á Extra-leikunum.

„Djöfull er ég pirraður og svekktur að þetta skítseyði hafi unnið þetta,“ sagði Andri niðurlútur eftir skautahlaupið. Hann var allt annað en sáttur með valið á lokagreininni.

„Að þessir frábæru leikar hafi ráðist á þessari keppni; ég set spurningarmerki við það. Mér fannst í raun enginn sigurvegari í dag,“ sagði Andri.

Í spilaranum hér fyrir ofan má sjá lokagrein Extra-leikanna.