Út­lit fyrir dómarakrísu í NFL deildinni

Samningurinn við dómarana rennur út í lok maí og hefur ekkert þokast í samningsviðræðum. Forráðamenn deildarinnar ætla ekki að standa uppi með tvær hendur tómar þá og verður farið í það fljótlega að semja við neðrideildar dómara. Deildin verður að hafa einhverja dómara næsta haust.

Dómararnir vilja mun meiri launahækkun en búið er að bjóða þeim og því er deilan í hnút.

Síðast varð dómaravesen í deildinni árið 2012 og þá voru neðrideildar dómarar að dæma í fyrstu vikum deildarinnar. Það gekk vægast sagt illa hjá varadómurunum og hver skandallinn rak annan. Slíkt vill enginn sjá aftur.

Pressan á eigendum er því mikil að þeir afgreiði þessa deilu í tíma fyrir upphaf næstu leiktíðar.