Loka bráðum á 3G-kerfið

Lokanir hefjast á höfuðborgarsvæðinu 8. apríl og í kjölfarið verður öllum 3G-kerfum lokað á landsbyggðinni í maí. Því verður ekki hægt að hringja neyðarsímtöl í 112 úr ákveðnum símtækjum. 

„Það er því brýnt öryggisatriði að eigendur þeirra tækja sem fengið hafa SMS frá sínu fjarskiptafélagi, um að nauðsynlegt sé að uppfæra eða skipta út tæki sínu, bregðist við sem fyrst,“ segir í fréttatilkynningu frá Fjarskiptastofu.

Þau brýna að fólk eigi ekki að hringja í 112 til að prófa samband þar sem það getur skapað álag og hindrað að neyðarsímtöl nái í gegn. Þeir sem eiga eldri símtæki eða keyptu þau erlendis eru sérstaklega hvattir til að hringja í 1280 til að athuga hvort tækið þeirra styðji við nýjustu tækni.

Öll fjarskiptafyrirtæki landsins (Síminn, Nova og Sýn) eru að loka 3G-kerfunum og er sú vinna í takt við þróunina á heimsvísu. 3G-kerfin eru komin til ára sinna og standast ekki lengur kröfur nútímans um hraða og öryggi.

„Notendur þurfa að hafa samband við sitt fjarskiptafyrirtæki til að ganga úr skugga um að þeirra tæki styðji við nýjustu tækni.“

Vísir er í eigu Sýnar.