„Stelpurnar skipta okkur alveg jafn miklu máli og strákarnir“

Ágúst Orri Arnarson skrifar 26. mars 2026 10:02

Blaðamannafundur verður loksins haldinn fyrir kvennalandsliðið í dag eins og venjan hefur verið fyrir karlalandsliðið. Marijan Murat/picture alliance via Getty Images

Jón Halldórsson, formaður HSÍ, tekur ekki undir þær fullyrðingar að sambandið mismuni kynjum í kynningarefni og auglýsingum fyrir landsleiki. Hann segir gagnrýnina verða tekna til skoðunar en stefnuna alltaf hafa verið að gera hlutina eins hjá báðum kynjum.

Ásthildur Bertha Bjarkadóttir, leikmaður í Olís deild kvenna í handbolta með liði ÍR, varpaði ljósi á misræmi í vinnubrögðum hjá sambandinu á samfélagsmiðlinum TikTok.

Af myndskeiði Ásthildar mátti greina að leikir karlalandsliðsins voru mun meira auglýstir á samfélagsmiðlareikningum HSÍ heldur en leikur kvennalandsliðsins.

Jón Halldórsson, formaður HSÍ, ræddi málið við Vísi í gær.

„Við skulum hafa það á kristaltæru að við sem stöndum þarna í stafni, við viljum að hlutirnir séu gerðir eins fyrir bæði kynin og höfum lagt okkur fram við það. Við fengum þessa gagnrýni og höfum verið að safna gögnum, svo við sjáum svart á hvítu hvernig þetta lítur út hjá okkur.

Þetta snerist um það sem kom fram á samfélagsmiðlum en við erum að auglýsa leiki á öðrum stöðum líka. En við skoðum að sjálfsögðu allt svona, af því við viljum og ætlum að gera vel. Stelpurnar okkar skipta okkur alveg gríðarlega miklu máli, alveg jafn miklu máli og strákarnir.“

Jón Halldórsson, formaður HSÍVísir/Sigurjón

Blaðamannafundur eða tölvupóstur?

Það er nú ekki hægt að segja að þið hafið lagt ykkur fram við að hafa þetta alveg eins, þegar leikmannahópur er tilkynntur með tölvupósti kvenna megin og blaðamannafundi í höfuðstöðvum Arion Banka karla megin.

„Við erum með blaðamannafund [í dag] þar sem við kynnum landslið kvenna með nákvæmlega sama hætti og karlalandsliðið. Við erum í ákveðnu ferli að þróa okkar starf. Við ætlum að gera hlutina eins en það bara tekur tíma. Þið munuð sjá það strax [í dag], sams konar blaðamannafund og var haldinn fyrir strákana.

Svo munuð þið sjá núna 12. apríl, þegar þær eru að keppa gríðarmikilvægan leik á móti Portúgal, þið munuð sjá sams konar umgjörð, allt eins í þeim leik eins og tengdist hjá strákunum.“

Ekki viðbragð við gagnrýninni

Jón tók þó ekki undir það að þessi blaðamannafundur í dag væri viðbragð við gagnrýninni. HSÍ hefur ekki haldið blaðamannafundi í síðustu verkefnum kvennalandsliðsins en boðaði skyndilega til fundar eftir að gagnrýnisraddir heyrðust.

„Þetta er eitthvað sem var búið að ákveða fyrir töluverðum tíma. Þetta er ekki viðbragð. Svona verður þetta bara,“ sagði Jón en viðtalið má sjá hér fyrir neðan.

Klippa: Jón Halldórsson svarar gagnrýni um kynjamismunun hjá HSÍ

Blaðamannafundur HSÍ vegna komandi umspilsleikja hjá kvennalandsliðinu fer fram klukkan 13:00 í dag og verður í beinni útsendingu á Vísi.

Landslið kvenna í handbolta EM kvenna í handbolta 2026 HSÍ