Yngsti sigur­vegarinn í sögu HM

Þessi sautján ára gamli Texasbúi afrekaði þetta þegar hann tryggði sér gullið í 800 metra hlaupinu, á undan Belgíumanninum Eliott Crestan.

Lutkenhaus verður ekki átján ára fyrr en 19. desember og sló því fyrra met yfir yngsta sigurvegara með töluverðum mun. Mohammed Aman frá Eþíópíu var átján ára og 61 dags gamall þegar hann sigraði á HM innanhúss árið 2012. Það var einnig í 800 metra hlaupi.

„Ég fór út á brautina og hugsaði með mér að ég væri kannski ekki sigurstranglegastur en þegar maður er kominn í úrslit á maður alltaf möguleika á að vinna,“ sagði þessi hávaxni sautján ára unglingur eftir gullhlaupið.

Lutkenhaus átti þátt í því að Bandaríkin voru efst á verðlaunatöflunni á HM innanhúss með fimm gullverðlaun alls.

Bandaríski unglingurinn hefur þegar látið að sér kveða utanhúss. Hann setti heimsmet í flokki átján ára og yngri með því að ná tímanum 1:42,27 mín. á bandaríska meistaramótinu síðastliðið sumar.

Það tryggði honum þátttökurétt á HM í Tókýó síðasta haust. Þar féll hann úr keppni í undanrásum eftir að hafa lent í sjöunda sæti í sínum riðli.