Alba að­eins frá sínu besta og Ís­lands­metið stendur

Christina bætti nýverið Íslandsmet ungmenna í greininni er hún fagnaði Íslandsmeistaratitli. Hún hljóp þá á 7,41 sekúndu.

Hún var í undanriðli þrjú af sjö á mótinu í Póllandi í morgun. Þar kom hún síðust í mark á tímanum 7,55 og var því 14 hundraðshlutum úr sekúndu frá sínum besta tíma og 20 hundraðshlutum frá Íslandsmetinu sem er 7,35 sekúndur.

Markmið hennar fyrir mótið var að slá metið en það tókst því ekki.

Mótið fer hins vegar í reynslubankann hjá þessari 18 ára gömlu hlaupakonu sem var að keppa í fyrsta sinn á stóra sviðinu.

Aníta Hinriksdóttir var fyrst íslensku keppendanna í brautina í gær er hún keppti í 1.500 metra hlaupi og ein stendur nú eftir.

Júlía Kristín Jóhannesdóttir, Íslandsmethafi í 60 metra grindahlaupi, sem þríbætti Íslandsmetið í greininni í vetur, keppir í hádeginu á morgun.