Flugið er líf­lína milli byggða Græn­lands

Í fréttum Sýnar var rifjuð upp gleðin þegar Grænlendingar fögnuðu opnun nýju brautarinnar í Nuuk í nóvemberlok 2024. Þá gat höfuðstaður landsins loksins tekið við stórum þotum.

Í þættinum Flugþjóðin á Sýn+ lýsir samskipta- og sjálfbærnistjóri Air Greenland, Inga Dóra Guðmundsdóttir, þýðingunni sem nýja flugbrautin hefur fyrir grænlenskt samfélag.

„Hún hefur rosa mikla þýðingu af því þetta eru aðaldyrnar inn á Grænland. Þannig að allir sem eru að koma til og frá Grænlandi fara hérna í gegn, meira eða minna allt árið.

Þessi flugvöllur breytir öllu kerfinu okkar, leiðakerfinu, þannig að það er bara mjög mikilvægt,“ segir Inga Dóra.

Hér má sjá átta mínútna kafla úr þættinum:

Strax með opnun nýju flugbrautarinnar varð Nuuk-flugvöllur í raun mikilvægasti samgönguinnviður Grænlands, kannski ásamt höfninni í Nuuk. Þetta er land sem hefur ekkert þjóðvegakerfi. Íbúarnir þurfa því að stóla á flugið til að komast á milli staða en sigla einnig á bátum ef styttra er að fara.

Dash 8 Q200 voru stærstu flugvélarnar sem gátu lent á gömlu brautinni í Nuuk. Þessar vélar geta notast við stuttar brautir og gegna ásamt þyrlum lykilhlutverki í að tengja saman byggðir Grænlands.

Flugið er lykilatriði í samgöngum landsins.

„Algjörlega. Við komumst ekkert fram eða til baka nema það séu einhvers konar samgöngur. Auðvitað á sumrin er hægt að bæta við siglingum svona innan marka,“ segir Inga Dóra.

Flug Air Greenland milli byggða á Grænlandi eru samþætt. Þyrlur fljúga til þeirra staða sem eru án flugvalla og flytja farþegana oftast á næsta innanlandsflugvöll. Þangað koma svo 37 sæta Dash 8 vélarnar og flytja farþegana áfram, gjarnan til Nuuk, þar sem mesta þjónustan er. Þaðan geta farþegar svo einnig tekið millilandaflugið ef leiðin liggur til útlanda.

Fjarlægðir og aðstæður á Grænlandi eru slíkar að íbúar smærri byggða treysta á flug til að sækja sér margskyns þjónustu eins og að fara til læknis.

Inga Dóra segir leiðakerfi Air Greenland það flóknasta í Evrópu.

„Það er líka dýrt að reka það.“

Air Greenland sinnir jafnframt sjúkraflugi og neyðar- og björgunarflugi.

„Flugið er náttúrulega líflína fyrir margar af þessum smábyggðum sem eru út um allt, sérstaklega á veturna,“ segir Inga Dóra Guðmundsdóttir í frétt Sýnar:

Þátturinn um Grænlandsflugið er sá sautjándi í þáttaröðinni. Áskrifendur geta séð hann í heild sem og alla þætti Flugþjóðarinnar á streymisveitunni Sýn+.