Viggó kom að tuttugu mörkum í fyrsta sigrinum á árinu 2026

Ómar Ingi Magnússon, kollegi hans í íslenska landsliðinu, skoraði tólf mörk í deildinni fyrr í dag en Viggó gerði enn betur og skilaði sextán mörkum og fjórum stoðsendingum í góðum sigri. Kom því að tuttugu mörkum Erlangen sem er mögnuð frammistaða í bestu deild í heimi.

Erlangen vann fimm marka heimasigur á Minden, 36-21, eftir að hafa unnið seinni hálfleikinn 20-16

Erlangen vann síðasta deildarleik 13. desember síðastliðinn á móti Leipzig en síðan þá hafði liðið aðeins náð í tvö stig úr sex leikjum (tvö jafntefli og fjögur töp).

Viggó var magnaður í fyrri hálfleiknum þar sem hann skoraði tíu mörk úr ellefu skotum og átti eina stoðsendingu að auki. Hann kom með beinum hætti að ellefu af sextán mörkum og Erlangen var aðeins einu marki yfir í hálfleik, 16-15.

Hálfleiksræðan hjá Minden hefur aðallega farið í það að stöðva Viggó og það gekk mun betur eftir hlé. Svona til að byrja með en svo fór Viggó á mikið flug undir lokin. Hann bætti á endanum við sex mörkum og þremur stoðsendingum í seinni hálfleiknum.

Andri Már Rúnarsson komst ekki á blað hjá Erlangen í leiknum.

Arnar Freyr Arnarsson skoraði þrjú mörk úr þremur skotum fyrir Melsungen í sex marka útisigri á Wetzlar, 38-32, og Reynir Þór Stefánsson bætti við einu marki en hann spilaði bara lokamínútur leiksins.