Slot finnst sjaldnast gaman að horfa á enska boltann

Á blaðamannafundi sínum fyrir leikinn á móti Úlfunum annað kvöld viðurkenndi Arne Slot að föst leikatriði væru „nýr veruleiki ensku úrvalsdeildarinnar í fótbolta“ og að honum þættu flestir leikir í deildinni ekki lengur ánægjulegir á að horfa vegna þess hve mikið væri reitt sig á þau.

Lið hans var jafnt neðsta liðinu þegar kom að því að skora úr föstum leikatriðum (fyrir utan vítaspyrnur) frá byrjun tímabilsins til 31. desember, en frá áramótum hefur ekkert lið skorað meira úr föstum leikatriðum en Liverpool.

Slot finnst leikmenn komast upp með of mikið gagnvart markverðinum í föstum leikatriðum.

„Ég horfi enn á hollensku deildina og þar er alltaf dæmt á brot gegn markvörðum. Hérna máttu næstum því kýla markvörð í andlitið og leikurinn fær bara að ganga áfram,“ sagði Arne Slot.

„Fótboltahjartað mitt kann ekki að meta það (í hvaða átt fótboltinn er að þróast). Ég hef oft sagt að ég hafði unun af því að horfa á Barcelona fyrir fimmtán árum,“ sagði Slot.

„Fyrst og fremst verðum við bara að sætta okkur við þetta. Ég held að þetta sé aðallega hér í ensku úrvalsdeildinni, því ef ég horfi á aðrar deildir er ekki lögð jafn mikil áhersla á föst leikatriði,“ sagði Slot.

„Flestir leikirnir í ensku úrvalsdeildinni eru ekki lengur ánægjulegir á að horfa en það er alltaf áhugavert þar sem samkeppnin er svo mikil. Það er það sem gerir þessa deild frábæra – hver sem er getur unnið hvern sem er,“ sagði Slot.

Hann telur að þessi þróun mála muni hafa áhrif meðal yngri iðkenda.

„Við munum samt ekki breyta því. Ég yrði bara ekki hissa ef þú færir að horfa á leik í utandeildinni núna eða að horfa á lið yngra en sextán ára einbeita sér algjörlega að föstum leikatriðum,“ sagði Slot.

Hollendingnum líkar þetta kannski ekki en það er alveg ljóst að lið hans hefur ekkert val nema að tileinka sér það og það hafa þeir svo sannarlega gert.

Sú staðreynd að Slot vonist til að Florian Wirtz verði kominn aftur í næstu viku er einnig hvetjandi fyrir Liverpool. Í ljósi óvissunnar síðustu viku voru efasemdir um að fjarvera hans gæti orðið lengri en Wirtz mun líklegast snúa aftur einhvern tíma í næstu viku, annað hvort gegn Galatasaray eða Tottenham.