Þegar for­seti Ís­lands mætti á júmbó-þotu

Í þættinum Flugþjóðin á Sýn+ er fjallað um júmbó-þotuna í höndum Íslendinga. Það þótti risastökk í íslenskri flugsögu og fyrir Air Atlanta þegar fyrsta 747-þotan var skráð á Íslandi en hún lenti á Keflavíkurflugvelli vorið 1993. Hún fékk einkennissstafina TF-ABK og nafnið Agnar Kofoed Hansen til heiðurs helsta frumkvöðli íslenskra flugmála.

Þóra Guðmundsdóttir, annar stofnanda Atlanta, rifjar upp hvernig henni leið að taka 747-þotu inn í rekstur Air Atlanta.

„Ég var með stóran kökk í hálsinum. Og ég hugsaði bara fyrir sjálfa mig: Hvað ertu búin að koma þér út í!

Svo leið ekki nema mánuður eða svo. Þá vantaði þá vél númer tvö,“ segir Þóra.

„Svo rétt á eftir þrjár,“ segir Arngrímur Jóhannsson, fyrrverandi eiginmaður Þóru og hinn stofnandi félagsins.

„Þetta byggði til að byrja með á pílagrímaflutningum,“ segir Arngrímur.

Þuríður Sigurðardóttir söngkona var í hópi flugfreyjanna í pílagrímafluginu hjá Air Atlanta.

„Þetta er stórkostlegt tæki. Og það er alltaf jafn heillandi að vera á flugvelli og horfa á þetta ferlíki taka sig á loft. Það er engu líkt,“ segir Þuríður.

En það var jafnframt farið að nýta júmbó-þotur Atlanta til að bjóða Íslendingum ódýrt flug til útlanda á vegum ferðaskrifstofunnar Samvinnuferða, þar á meðal til Bahama-eyja. Þóra lýsir einnig ferðum með forseta Íslands, Ólaf Ragnar Grímsson, í opinberar heimsóknir, eins og til Indlands.

Forsetinn og sendinefnd hans tóku þó aðeins lítinn hluta sætanna. Áskrifendum Stöðvar 2 var boðið að kaupa stærsta hlutann. Það þótti hins vegar tilkomumikið að sjá forseta Íslands mæta í opinbera heimsókn til Indlands á júmbó-þotu, rétt eins og hér væri Bandaríkjaforseti á ferð.

„Það var svolítið grand,“ segir Þóra í þættinum en hér má sjá sjö mínútna kafla.

Þátturinn um júmbó-þotuna er sá sextándi í þáttaröðinni. Áskrifendur geta séð þáttinn í heild sem og alla þætti Flugþjóðarinnar á streymisveitunni Sýn+.