„Maður þarf að sýna ást og maður þarf að skilja sinn maka“

„Tilfinningin er mjög góð og skemmtilegt að ná þessum áfanga að fara í bikarúrslit,“ sagði Stefán, eftir sigur liðsins í kvöld.

„Við vissum að þetta yrði erfiður leikur. Við vorum svolítið linar varnarlega í fyrri hálfleik. Við vorum að fá of mörg ódýr mörk á okkur, en svo lagaðist það í seinni hálfleik.“

„Við náðum þá að komast í fjögurra marka forystu einu sinni, en á meðan við erum einum fleiri missum við það niður í tvö og það var slakur kafli hjá okkur. Okkur tókst að koma til baka og unnum góðan sigur.“

Jóhanna Margrét Sigurðardóttir haltraði af velli undir lok leiksins. Stefán sagði eftir leik að hann vissi ekki stöðuna á meiðslunum en að þau litu ekki frábærlega út.

Aðspurður hvernig hann liti til úrslitaleiksins þá var svarið einfalt.

„Bikarinn er þannig að maður þarf að sýna ást og maður þarf að skilja sinn maka, þú getur ekki ástinni bara ætlað að taka. Það þýðir ekki að vera maður hálfur, maður þarf að vera heill maður.“